NZWISISO
| zvinangwa: Panopera chidzidzo chino mudzidzi anotarisirwa kunge ogona: |
- Kupindura zvakanaka mibvunzo yenzwisiso.
- Kutsanangura mazwi matsva.
- Kupfupisa ndima.
|
- Pane mibvunzo inobvunzwa kubva mundima dzenzwisiso dzaverengwa.
- Mibvunzo iyi inoenderana nezviri munzwisiso, nokudaro kana wava kupindura mibvunzo, mhinduro dzako ngadzive nechekuita nendima yawaverenga.
Pane mibvunzo inotarisirwa kubvunzwa yakaita seinotevera:
- Mubvunzo wekupa musoro wenyaya yawaverenga.
- Kana wapiwa mubvunzo wakadai unofanira kutanga wanyatsoverenga nyaya kana detembo racho kusvika wanzwisisa chiri kutaurwa nezvacho.
- Unofanira kupa musoro unoenderana nezviri mundima kwete kungopa musoro wawangofunga mumusoro wako.
- Musoro wenyaya ngausarebe. Unofanira kuve nemazwi asingapfuuri matatu kana rimwe chairo.
- Kazhinji pane mibvunzo inobvunza nezvetsananguro yemazwi kana zvirevo zvinenge zvakashandiswa.
- Mubvunzo wakadai unoda kuti upe tsananguro nemazwi ako kwete kungonyurura zviri mundima.
- Tsumo, madimikira kana fananidzo ndizvo zvimwe zvinogona kubvunzwa. Apa unofanira kupa tsanangudzo inoenderana nezviri kuitika mundima kana mudetembo.
- Tsanangudzo yacho ngaisave izwi rimwe chete kana kuti wopa imwe tsumo kana dimikira pachinzvimbo chekutsanangura zvakanaka.
- Pane imwe mibvunzo yekuti kubva munzwisiso yawapiwa, unofanirwa kunyurura tsumo, dimikira kana fananidzo inoenderana netsanangudzo yakapiwa.
- Unofanira kungonyurura tsumo, dimikira kana fananidzo inoenderana nazvo.
- Haufaniri kunyora tsumo kana madimikira akafanana neari mundima.
- Mimwe mibvunzo ndeyekuti unopiwa mhinduro dzakawanda iwe wosarudza inokodzera.
- Apa kungosarudza mhinduro imwe pane dzawakapiwa.
- Haufaniri kunyora mhinduro yemusoro wako yausina kupiwa.
Pane mibvunzo yokuti unofanira kuzadzisa pakashama.
- Mibvunzo yakadai inoda kuti uise mhinduro yako panzvimbo yacho yakashama.
- Kunewo mibvunzo inobvunza zviri pachena kubva mundima sokuti:
- Ndiani______________?
- Nemhaka yei _________?
- Chii chakakonzera_____?
- Ndezvipi zvinhu zvishanu____?
- Iyi mibvunzo isinganetsi kupindura kana waverenga ndima ukainzwisisa.
- Kunozoitawo imwe mibvunzo inoda kuti ushandise ruzivo rwako rwusinei nezviri mundima semuenzaniso:
- Tsanangudza kugadzirwa kunoitwa dovi?
- Chidao chekuti Nyakudirwa ndechemutupo up?
Cherechedza
Kana uchipindura mibvunzo yose usapedze nguva uchingotenderera kana kudzokorora zvabvunzwa mumubvunzo, semuenzaniso:
Chiiko chakasangana nababa vaChamunorwa pavaienda naye kunotora chibage kwasekuru?
Kana vakasangana negudo, haungapinduri uchiti,
Chakasangana nababa vaChamunorwa pavaienda naye kunotora chibage kwasekuru igudo.
Mhinduro kwayo inonyorwa sezvizvi:
Vakasangana negudo.
